Ágætu samkomugestir.

Sú var tíðin að bifreiðasmíði var all umfangsmikill iðnaður hér á landi. Hver man ekki eftir Willisunum gömlu með yfirbyggingu frá Agli Vilhjálmssyni, eða rútunum sem smíðað hefði verið yfir hjá Bílasmiðjunni hf, sem áður rak smíðaverkstæði á þeim stað á Laugaveginum sem hýst hefur Sjónvarpið frá upphafi. Það húsnæði varð laust þar sem Bílasmiðjan þurfti að stækka við sig vegna tilkomu hægrihandar umferðarinnar og flutti þá starfsemi sína hingað í Ártúnsholtið.

Bifreiðasmíðin dafnaði vel á þeim tímum þegar gjaldeyrir var að skornum skammti og aðdrættir ýmsum takmörkunum bundnir. Þeir tímar eru löngu liðnir og íslnenskur bílaiðnaður hefur tekið þeim eðlilegu breytingum að fást nú fyrst og fremst við sértækar lausnir sem mótaðst hafa - annars vegar af séstökum landfræðilegum- og veðurfarslegum aðstæðum okkar og - hins vegar af háu þekkingarstigi þjóðarinnar.

Þetta hefur m.a. leitt til þess að breytingar á jeppabílum hefur þróast frá því að vera afþreying fárra sérvitringa í það að verða fullgild atvinnugrein sem notið hefur virðingar víða um heim og borið hróður okkar allt frá nyrsta bóli jarðarinnar til Suðurskautslandsins. Ekki er því heldur að gleyma að þessi sérviskulega sýslan okkar hefur skapaða af sér nýja grein innan akstursíþróttarinnar.