Malaví meðal þriggja Afríkuríkja sem prófa bóluefni gegn malaríu
Fyrsta bóluefnið gegn malaríu verður prófað í þremur
Afríkuríkjum á næsta ári, Gana, Kenía og Malaví. Eftir áratugalangar
rannsóknir var greint frá því fyrir tveimur árum að tekist hefði að þróa
mótefni gegn malaríu (mýrarköldu) og á næsta ári er komið að því að
reyna á notagildi RTS,S bóluefnisins. Það gæti bjargað tugþúsundum
mannslífa á hverju ári, að mati Alþjóðaheilbrigðisstofnunarinnar (WHO),
en tæplega helmingur jarðarbúa er í áhættuhóp gagnvart malaríusýkingum.
Samkvæmt frétt BBC er þó enn óljóst
hversu gagnlegt bóluefnið reynist í fátækustu ríkjum heims. Gefa þarf
bóluefnið fjórum sinnum, einu sinni í mánuði í þrjá mánuði og síðan í
fjórða sinn átján mánuðum síðar. Bóluefnið styrkir ónæmiskerfið gegn
frumdýri sem veldur malaríu og berst með biti moskítóflugunnar.
Á hverju
ári deyr um hálf milljón manna af völdum malaríu, rúmlega níu af hverjum
tíu í Afríku og mikill meirihluti þeirra börn. Talsvert hefur þó á
síðustu árum dregið úr nýgengi sjúkdómsins og samkvæmt gögnum
Alþjóðaheilbrigðisstofnunarinnar (WHO) fækkaði malaríutilvikum í
heiminum um 21% á árunum 2010-2015. Dauðsföllum af völdum malaríu
fækkaði um 29% á sama tímabili.
Alþjóðlegi malaríudagurinn var í gær, 25. apríl.
It took decades of research, but the world's first malaria vaccine is finally ready for showtime/ Qz
Prevent malaria - save lives: WHO push for prevention on World Malaria Day, 25th April/ WHO