Kjörskrá

Gerð kjörskrár

Á kjörskrá skal taka þá sem uppfylla öll kosningarréttarskilyrði á viðmiðunardegi kjörskrár. Sjá nánar um kosningarrétt.

Kjörskrá skal rita á eyðublöð sem Þjóðskrá Íslands lætur í té og skal farið nákvæmlega eftir leiðbeiningum hennar. Þjóðskrá Íslands sendir sveitarstjórnum kjörskrárstofn fljótlega eftir viðmiðunardag kjörskrár.

Sveitarstjórnir bera ábyrgð á að kjörskrár séu gerðar og skal gerð þeirra lokið í tæka tíð fyrir framlagningu. Kjörskrá skal undirrituð af oddvita sveitarstjórnar eða framkvæmdastjóra hennar. Kjörskrá skal leggja fram almenningi til sýnis á skrifstofu sveitarstjórnar eða á öðrum hentugum stað eigi síðar en tíu dögum fyrir kjördag. Sveitarstjórn skal auglýsa hvar kjörskrá liggur frammi á þann hátt á hverjum stað sem venja er þar að birta opinberar auglýsingar.

Sveitarstjórn ber að gæta þess að taka ekki aðra einstaklinga á kjörskrá en ótvírætt eiga kosningarrétt samkvæmt ákvæðum laga. Rétt er að ítreka að ávallt skal miða við skráð lögheimili samkvæmt íbúaskrá Þjóðskrár fimm vikum fyrir kjördag. Ekki er því um huglægt mat að ræða og því er til dæmis ekki heimilt að taka einstakling inn á kjörskrá sem gleymt hefur að flytja lögheimili sitt til sveitarfélagsins í tæka tíð fyrir viðmiðunardag kjörskrár.

Sveitarstjórn skal þegar taka til meðferðar athugasemdir er henni berast vegna kjörskrár og gera leiðréttingar á henni ef skilyrði þess eru fyrir hendi. Slíka leiðréttingu má gera fram á kjördag. Þar sem skilyrði skráningar á kjörskrá eru skýr eiga sveitarstjórnir ekki að þurfa að gera margar leiðréttingar á þeim kjörskrárstofni sem Þjóðskrá Íslands lætur þeim í té. Tilefni slíkra leiðréttinga eru einkum öflun eða missir íslensks ríkisfangs eða andlát á tímabilinu frá viðmiðunardegi kjörskrár fram á kjördag.

Sveitarstjórn skal þegar tilkynna hlutaðeigandi einstaklingum um leiðréttingar á kjörskrá, svo og sveitarstjórnum þeim er málið getur varðað. Jafnframt skal tilkynna hlutaðeigandi yfirkjörstjórn um leiðréttingu á kjörskrá.

Ef sveitarstjórn vanrækir sitt hlutverk varðandi samningu eða framlagningu kjörskrár er það hlutverk viðkomandi sýslumanns að bregðast við. Skal sýslumaður þá þegar gera nauðsynlegar ráðstafanir til að bæta úr því sem á vantar.

Óheimilt er að afhenda stjórnmálasamtökum eða öðrum kjörskrá og kjörskrárstofna.  

Viðurkenndir úrtaksaðilar sem hafa gert samning við Þjóðskrá Íslands hafa heimild til þess að framkvæma úrtök úr þjóðskrá og er þeim heimilt að afhenda gögn sem unnin eru á grundvelli kjörskrárstofna að því gefnu að tekið hafi verið tillit til bannmerkingar í þjóðskrár. 

Lista yfir viðurkennda úrtaksaðila er unnt að nálgast hér: https://skra.is/gogn/adgangur-ad-gognum/thjodskra/

• Nánari upplýsingar um kjörskrá, hjá Þjóðskrá Íslands,