Hoppa yfir valmynd

Bráðabirgðafríverslunarsamningur Íslands og Noregs við Bretland

Bráðabirgðafríverslunarsamningur Íslands og Noregs við Bretland mun taka gildi þann 1. janúar 2021. Meginmarkmið samningsins er að viðhalda núverandi tollakjörum í vöruviðskiptum milli ríkjanna á grundvelli EES-samningsins og annarra tengdra viðskiptasamninga. Samningnum er ætlað að brúa bilið þangað til nýr víðtækur fríverslunarsamningur tekur gildi á milli ríkjanna.

Í samningnum er viðhaldið núverandi tollaívilnunum samkvæmt samningum Íslands og ESB, þ.m.t. fyrir sjávarafurðir. Hafi Bretland áður nýtt tollfrjálsa innflutningskvóta samkvæmt samningum Íslands við ESB, er stærð kvóta milli Íslands og Bretlands ákveðin að teknu tilliti til meðalnýtingar á kvótum til og frá ESB á viðmiðunartímabilinu 2014-2016, byggt á stærð ESB-kvóta á árinu 2019.

Á þeim grundvelli mun Ísland veita Bretlandi eftirfarandi tollfrjálsa innflutningskvóta:

  • 19 tonn af hvers konar osti
  • 11 tonn af ostum sem verndað afurðaheiti sem vísar til uppruna
  • 18,3 tonn af unnum kjötvörum

Atvinnuvega- og nýsköpunarráðuneytið mun auglýsa kvótanna til umsóknar.

Að sama skapi fær Ísland eftirfarandi tollfrjálsa innflutningskvóta til Bretlands:

  • 692 tonn af lambakjöti, með eða án beins (samsvarar yfir 1.000 tonnum af heilum skrokkum)
  • 329 tonn af skyri
  • 145 tonna kvóta (alls) fyrir lax, flatfisk og fl. tegundir, fersk karfaflök, síld og humar.

Bretland mun beita kvótunum á grundvelli reglunnar um „fyrstur kemur fyrstur fær“.

Samningurinn fjallar að litlu leyti um tæknilegar viðskiptareglur, en markmið breskra stjórnvalda er að fyrst um sinn munu innflutningsreglur haldist að mestu óbreyttar við innflutning íslenskra vara til Bretlands, þ.m.t. vegna innflutnings sjávarafurða. Innflutningseftirlit með sjávarafurðum og öðrum dýraafurðum verður innleitt í þrepum fram til 1. júlí nk.  Útflytjendur íslenskra vara eru hvattir til að hafa varan á við innflutning á sjávarafurðum og dýraafurðum inn til Bretlands og að passa upp á að skilyrðum hverju sinni sé fylgt eftir 1. janúar nk. (sjá nánar upplýsingar á heimasíðu MAST)

Í samningnum er tryggt að afurðaheiti sem vísa til uppruna og njóta verndar á grundvelli samnings Íslands og ESB muni halda áfram að njóta verndar a.m.k. þar til nýr fríverslunarsamningur liggur fyrir.

Samningurinn er liður í að tryggja kjarnahagsmuni Íslands gangi Bretland úr ESB án samnings. Hann mun tryggja áframhaldandi útflutning 55.000 tonna af sjávarafurðum til Bretlands eftir Brexit á a.m.k. sömu tollkjörum og gilda í dag, um 35-40 milljarða kr. útflutningsverðmæti á ári hverju. Samningurinn tryggir enn fremur óbreytt tollkjör vegna innflutnings frá Bretlandi.

Bresk stjórnvöld hafa síðustu misseri unnið að því að afrita fríverslunarsamninga ESB til að tryggja aðgang að fríverslunarneti við útgöngu án samnings. Ekki er hægt að afrita EES-samninginn í nýjan samning með sama hætti í heild sinni við þær aðstæður þar sem hann felur í sér þátttöku í innri markaði ESB. Því var ákveðið að ganga frá bráðabirgðasamningi um vöruviðskipti en ræða aðra þætti í viðræðum um framtíðarsamband Íslands og Bretlands.

Markmið Bretlands, Íslands og Noregs er að samningurinn gildi þar til samið hefur verið um nýjan og viðameiri fríverslunarsamning á milli ríkjanna. Þær viðræður eru í fullum gangi og vonir standa til að þeim ljúki tímanlega á árinu 2021.

Frekari upplýsingar:

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira