Atvinnulíf og þróunarsamvinna

Í stefnu Íslands um alþjóðlega þróunarsamvinnu er lögð áhersla á samstarf við atvinnulífið. Stjórnvöld vilja hvetja einkageirann til að leggja sitt af mörkum til verðmæta- og atvinnuskapandi verkefna í þróunarlöndum og vinna að framgangi heimsmarkmiða Sameinuðu þjóðanna. Lausnir, sérþekking og fjárfestingar íslenskra fyrirtækja geta stuðlað að sjálfbærri þróun, aukinni hagsæld og skapað tækifæri fyrir fólk í þróunarlöndum að brjótast úr viðjum fátæktar. Ísland horfir til Þróunarsamvinnunefndar Efnahags- og framfarastofnunar Evrópu (OECD, DAC) við framkvæmd verkefna en stofnunin hefur meðal annars það hlutverk að fylgjast með því að aðildarlöndin starfi á grundvelli alþjóðlegra skuldbindinga.

„Hið opinbera og einkageirinn þurfa að taka höndum saman til að ná alþjóðlegum markmiðum á sviði þróunarsamvinnu. Hlutur einkageirans til þróunarsamvinnu á alþjóðavísu hefur aukist mjög undanfarinn áratug og er orðinn jafn framlagi opinberra aðila. Íslensk fyrirtæki búa yfir þekkingu og hæfni til að stuðla að sjálfbærum hagvexti og atvinnutækifærum í þróunarlöndum, en um leið búa þau í haginn fyrir framtíðarmakaði í þessum löndum.  Hátt í tuttugu íslensk fyrirtæki hafa þegar sótt stuðning í Heimsmarkmiðasjóð atvinnulífs um þróunarsamvinnu og hvet ég önnur fyrirtæki til að feta í fótspor þeirra.“ - Þórdís Kolbrún Reykfjörð Gylfadóttir, utanríkis- og þróunarsamvinnuráðherra.