Hoppa yfir valmynd

Tvísköttunar- og upplýsingaskiptasamningar

Gerð tvísköttunarsamninga

Með tvísköttun tekna eða eigna er átt við álagningu skatts á sama skattstofn hjá sama skattaðila í tveimur ríkjum á sama tímabili. Markmið tvísköttunarsamninga er að koma í veg fyrir slíka tvísköttun á tekjur og eignir en jafnframt að vinna gegn skattasniðgöngu.

Samningsfyrirmynd Íslands við gerð tvísköttunarsamninga er að mestu leyti sniðin eftir samningsfyrirmynd Efnahags- og framfarastofnunarinnar í París (OECD). Fyrirmynd OECD inniheldur tvær meginaðferðir sem unnt er að beita til að koma í veg fyrir tvísköttun, þ.e. undanþáguaðferð og frádráttaraðferð. Undanþáguaðferðin felur það í sér að tekjur sem eru upprunnar í samningsríki A eru undanþegnar skattlagningu í samningsríki B. Frádráttaraðferðin felst í því að fullur skattur er reiknaður á allar tekjur skattgreiðanda í samningsríki A en reiknaður skattur síðan lækkaður um fjárhæð jafna því sem viðkomandi hefur greitt í skatta af sömu tekjum eða eignum í samningsríki B. Frádrátturinn verður þó aldrei hærri en reiknaður skattur í samningsríki A. Í samningsfyrirmynd Íslands er frádráttaraðferðin meginreglan.

Tvísköttunarsamningar öðlast gildi að þjóðarrétti þegar samningarnir hafa verið fullgiltir af báðum samningsríkjum og koma oftast til framkvæmda í upphafi næsta almanaksárs eftir fullgildingu.

Nýlegar breytingar á sviði tvísköttunarsamninga

Í kjölfar samþykktar á svokallaðri BEPS aðgerðaráætlun (skammstöfun fyrir Base Erosion and Profit Shifting; í íslenskri þýðingu barátta gegn rýrnun skattstofna og tilfærslu hagnaðar), sem Efnahags- og framfarastofnunin (OECD) ásamt G20 ríkjunum stóð fyrir, hefur farið fram endurskoðun á markmiðum og tilgangi tvísköttunarsaminga. Þar bar hæst að finna lausn til að vinna gegn þeirri þróun sem átt hefur sér stað, einkum meðal alþjóðafyrirtækja, þar sem skattaskipulagning þeirra er með þeim hætti að skattgreiðslur fyrirtækjanna verða mjög lágar ef þá einhverjar. Aðferð þeirra er sú að nýta glufur sem verða til vegna mismunandi skattareglna í viðkomandi ríkjum í samspili við tvísköttunarsamninga, sem hefur leitt til þess að tilfærsla verður á hagnaði fyrirtækjanna frá háskattasvæðum til lágskattasvæða.

Lausnin, sem samþykkt hefur verið, er í raun tvíþætt. Annars vegar verður eldri tvísköttunarsamningum breytt með marghliða samningi (MLI, e. Multilateral Instrument) sem setur ákveðnar lágmarkskröfur á grundvelli BEPS. Ákvæði MLI munu ganga framar tilgreindum ákvæðum í tvísköttunarsamningi ríkja sem hafa komist að sameiginlegri niðurstöðu um að beita MLI. Fjármála- og efnahagsráðherra mun staðfesta MLI fyrir hönd Íslands í byrjun júní nk.

Hins vegar eru í farvatninu ýmsar afleiddar breytingar af BEPS og MLI sem rata munu inn í samningsfyrirmynd OECD sem hafa munu áhrif á samningsfyrirmynd Íslands til framtíðar. Meginmarkmið breytinganna er að taka af öll tvímæli um að tvísköttunarsamningum er ekki ætlað að ná fram lágmarks- eða engri skattlagningu eða tvískattlagningu heldur standa gegn skattasniðgöngu af hvers kyns tagi. Ný útgáfa af samningsfyrirmynd OECD verður gefin út í september 2017 og er vinna við endurskoðun á íslensku samningsfyrirmyndinni með hliðsjón af væntanlegum breytingum OECD og ýmsum breytingum á innlendri skattalöggjöf þegar hafin. Vonast er til að þeirri vinnu ljúki fyrir áramót þannig að ný samningsfyrirmynd fyrir Ísland taki gildi í ársbyrjun 2018.

https://www.rsk.is/fagadilar/fatca/

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn


Þessi síða notar vafrakökur Lesa meira