Samstarfsaðilar

Námsbraut í kynjafræði við Háskóla Íslands

Allt frá því fyrstu skerf voru tekin að innleiðingu kynjaðrar fjárlagagerðar hér á landi hefur fjármála- og efnahagsráðuneytið átt í góðu samstarfi við námsbraut í kynjafræði við Háskóla Íslands. Samstarfið veitir nemendum í kynjafræði tækifæri til að vinna verkefni í samstarfi við ráðuneyti undir handleiðslu kennara við námsbrautina. Ráðuneytin leggja til gögn sem nemendur vinna úr og rannsaka út frá kynja- og jafnréttissjónarmiðum gæði stefnu og verkefna sem unnið er að innan ráðuneytanna.

• Námsbraut í kynjafræði 

Reykjavíkurborg

Innleiðing á kynjaðri fjárhags- og starfsáætlun (KFS) hjá Reykjavíkurborg hófst árið 2011. Markmiðið með innleiðingunni er að samþætta mannréttindastefnu og fjármálastefnu borgarinnar. Samstarf við Reykjavíkurborg hefur mikið til falist í miðlun þekkingar og reynslu af kynjaðri fjárlagagerð milli aðila auk þess sem unnið hefur verið að gerð fræðsluefnis.

• Kynjuð fjárhagsáætlunargerð hjá Reykjavíkurborg

Femínísk fjármál

Femínísk fjármál er félag áhugafólks og sérfræðinga um kynjuð fjármál með þann tilgang að efla þekkingu á kynjuðum fjármálum og veita stjórnvöldum aðhald. Í samræmi við fimm ára áætlun um kynjaða fjárlagagerð er fundað reglulega með félaginu, sér í lagi í tengslum við framlagningu fjármálaáætlunar og fjárlagafrumvarps.

• Femínísk fjármál 

Efnahags- og framfarastofnunin - OECD

Ísland tekur virkan þátt í starfi sérfræðingahóps aðildarríkja Efnahags- og framfarastofnunarinnar (OECD) um kynjaða fjárlagagerð og átti stóran þátt í mótun og stofnun hópsins árið 2017 auk þess að gegna leiðandi hlutverki fyrstu árin. OECD hefur m.a. gert könnun á stöðu kynjaðrar fjárlagagerðar í aðildarríkjum og tekið saman upplýsingar um atriði sem hafa þarf í huga við innleiðingu kynjaðrar fjárlagagerðar og stutt geta við ferlið. 

• OECD - Gender budgeting