Styrkir til félagsamtaka í þróunarsamvinnu

Styrkveitingar til félagasamtaka í þróunarsamvinnu

Hafa þín félagasamtök áhuga á að leggja sitt af mörkum til að ná heimsmarkmiðum Sameinuðu þjóðanna? Undir hatti samstarfs við félagsamtök bíður utanríkisráðuneytið uppá styrkveitingar til þriggja tegunda verkefna:

• Þróunarsamvinnuverkefna
• Mannúðaraðstoðar
• Kynningar- og fræðsluverkefna

Auglýst er reglulega eftir umsóknum um styrki vegna samstarfsverkefna af þessu tagi.

Um framlögin

Markmið með samstarfi við félagsamtök og fyrirtæki í þróunarsamvinnu er að draga úr fátækt, bregðast við neyðarástandi og styðja við atvinnusköpun og sjálfbæran vöxt í þróunarríkjum. Þátttaka og samstarf ólíkra hagsmunaaðila er grundvöllur þess að hægt sé að ná heimsmarkmiðum Sameinuðu þjóðanna um sjálfbæra þróun á fullnægjandi hátt.

Boðið er uppá styrki til mannúðaraðstoðar og þróunarsamvinnuverkefna, þ.m.t. styttri verkefna, langtíma verkefna og nýðliðaverkefna. Einnig geta félög sótt um kynningar- og fræðslustyrki. Nánari upplýsingar um umsóknir má finna neðst á síðunni.

Veittir eru styrkir til verkefna sem koma til framkvæmdar á lista Þróunarsamvinnunefndar Efnahags- og framfarastofnunarinnar (OECD DAC) um viðtökulönd opinberrar þróunaraðstoðar, með áherslu á lág- og lágmillitekjuríki auk smáeyþróunarríkja. Kynningar- og fræðsluverkefni skulu framkvæmd á Íslandi.

Styrkhæfir aðilar

Styrkveitingar eru takmarkaðar við íslensk félagasamtök og þurfa þau að uppfylla eftirtalin skilyrði:

• Vera skráð í fyrirtækjaskrá ríkisskattstjóra sem félagasamtök, skv. rekstrarformi eða starfsgreinaflokkun, eða vera skráð sem félag til almannaheilla með starfsemi yfir landamæri skv. lögum nr. 119/2019,
• ekki vera rekin í hagnaðarskyni (e. non-profit),
• hafa sett sér lög og starfandi stjórn,
• félagsmenn, styrktaraðilar eða stuðningsaðilar séu minnst 30 talsins,
• hafa lagt fram staðfestan ársreikning.

Umsækjendur þurfa að uppfylla kröfur Ríkisendurskoðunar um meðferð og vörslu fjármuna á sviði þróunarsamvinnu og mannúðaraðstoðar.

Umsóknarferli

Utanríkisráðherra úthlutar styrkjum að fengnu áliti matshóps skipuðum þremur sérfræðingum eftir því sem við á. Umsóknarfrestur fyrir hvern flokk er að öllu jafna 6 vikur frá upphafsdegi umsóknarferils.

Þróunarsamvinnuverkefni: Opið var fyrir umsóknir um styrki vegna þróunarsamvinnuverkefna frá 19. mars – 30. apríl 2021. Tilkynnt var um úthlutun í 6. júlí 2021. Ekki stendur til að auglýsa að nýju vegna umsókna um styrki til þróunarsamvinnuverkefna á árinu. Næsta umsóknarferli er áætlað snemma árs 2022.

Mannúðaraðstoð: Opið er fyrir umsóknir vegna mannúðaraðstoðar allt árið um kring svo lengi sem fjárheimildir leyfa. Vinsamlegast athugið að búið er að útdeila þeim fjármunum sem ætlaðir voru til mannúðaraðstoðar á vegum íslenskra félagasamtaka á árinu 2021. Móttaka umsókna hefst að nýju í janúar 2022.

Kynningar- og fræðsluverkefni: Áætlað er að auglýsa aftur vegna þessara verkefna seinni hluta árs 2021. Tilkynnt var um fyrri úthlutun ársins í mars 2021.

Rammasamningar: Auglýst var eftir áhugayfirlýsingum frá reyndum félagasamtökum sem hafa áhuga á að fá rammasamning við ráðuneytið vegna alþjóðlegrar þróunarsamvinnu og/eða mannúðaraðstoðar. Auglýsingu og nánari upplýsingar má finna undir flipanum „Rammasamningar“. Opið var fyrir umsóknir frá 26. maí – 8. júní 2021. Áætlað er að niðurstaða liggi fyrir undir lok árs 2021.

Eyðublöð og önnur gögn

Eyðublöð og önnur viðeigandi gögn fyrir hvern flokk fyrir sig má nálgast hér að neðan. Athygli er vakin á því að matsblöð og verklagsreglur eru mismunandi fyrir hvern málaflokk.